Policia e Dibrës zbardh dinamikën e ngjarjes ku një i mituri goditi të moshuarën në rrugë, kurse djali i 82-vjeçares dhe infermieret e Qendrës Shëndetësore në Ostren fshehën shkaqet dhe dinamikën e krimit.
Vdekja e një gruaje të moshuar mbrëmjen e 28 Gushtit, në fshatin Ostren të Bulqizës, nuk ishte natyrore apo nga rrëzimi, por një aksident rrugor i shkaktuar nga një i mitur, që drejtonte mjetin motor pa leje drejtimi.
Policia e Dibrës njoftoi sot se pas shoqërimit të të dyshuarit një ditë më pas, sot ka zbardhur ngjarjen e ndodhur për vdekjen e 82-vjeçares S.M., dhe ka arrestuar si të dyshuar drejtuesin 16-vjeçar.
Gjithashtu mori nën akuzë edhe djalin e viktimës, si dhe dy infermieret e Qendrës Shëndetësore në Ostren, pasi fshehën detajet dhe dinamikën e ngjarjes, duke e shitur atë si një rrëzim në rrugë. Të akuzuarit po hetohen për “aksident me pasojë vdekjen”, “drejtim mjeti pa leje”, “veprime që pengojnë zbulimin e së vërtetës" dhe "shpërdorimi i detyrës".
