Dy 19-vjeçarë në Durrës janë vendosur në pranga pasi posedonin lëndë narkotike kokainë të ndarë në doza gati për shitje. Sekuestrohen dhjetëra doza kokainë dhe automjeti që lëviznin të rinjtë për të realizuar shpërndarjen e drogës.
Njoftimi i policisë:
Si rezultat i administrimit të menjëhershëm të informacioneve të siguruara nga inteligjenca policore, në kuadër të megaoperacionit “Tempulli”, se 2 shtetas shisnin lëndë narkotike kokainë në doza, në lokalet e natës në Durrës, Seksioni për Hetimin e Narkotikëve i DVP Durrës, në bashkëpumim me Forcën e Posaçme "Shqiponja", ka finalizuar operacionin policor të koduar “Last Dinner”.
Gjatë operacionit në afërsi të Stacionit të Trenit, u kapën në flagrancë dhe u vunë në pranga për veprën penale "Prodhimi dhe shitja e narkotikëve" kryer në bashkëpunim , shtetasit:
G. D., 19 vjeç dhe A. L., 19 vjeç, të dy banues në Shënavlash, Durrës.
Nga kontrolli në automjetin me të cilin lëviznin këta shtetas, shërbimet e Policisë gjetën dhe sekuestruan në cilësinë e provës materiale, një sasi lënde narkotike kokainë të ndarë në doza, gati për shitje.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
