Qeveria miraton ndryshimin e ligjit për Urdhrin e Mjekut. Sipas këtyre ndryshimeve do të ngrihet një regjistër elektronik ku do të jenë emrat e mjekëve që punojnë në shtet por dhe punësimin e tyre në privat.
Gjithashtu është caktuar tavan për orët që një mjek që punon në spitale shtetërorë mund të kryejë edhe në privat. Si dhe drejtuesit e institucioneve publike shëndetësore nuk mund të drejtojnë klinika private.
Fjala e Ministres së Shëndetësisë dhe Mbrojtjes Sociale, Albana Koçiu pas mbledhjes së Qeverisë lidhur me ndryshimet në Ligjin për “Urdhërin e Mjekut”:
Në vazhdën e propozimeve dhe angazhimeve që qeveria ndërmori ndërkohë që sigurojmë dhe garantojmë cilësinë e shërbimit në strukturat shëndetësore, sot miratuam pas një konsultimi të gjerë dhe të praktikave ndërkombëtare një ndryshim në ligjin për “Urdhërin e Mjekëve në Republikën e Shqipërisë”.
Qëllimi kryesor i ndryshimeve të propozuara në këtë ligj ka të bëjë me atë që është interes primar i qytetarëve, garantimin e cilësisë së shërbimit në strukturat tona shëndetësore për të gjithë qytetarët, për të gjithë pacientët që i drejtohen strukturave publike shëndetësore.
Dua të theksoj që në kryer të herës atë angazhim që ne morëm bashkarisht për të garantuar dhe për siguruar një balancë mes interesit primar të qytetarëve dhe interesit të mjekëve dhe strukturave publike shëndetësore që është shmangia sa më shumë e mundur e konfliktit të interesit në rastin e çdo profesionisti të mjekësisë i cili punon në strukturat shëndetësore publike.
Ndryshimet që kemi propozuar në ligjin dhe që u miratuam sot me vendimin më të fundit të Qeverisë në ligjin për “Urdhërin e Mjekëve në Republikën e Shqipërisë”, kryesisht konsistojnë në bërjen publike dhe transparente të informacionit për të gjithë profesionistët e shëndetësisë që punojnë në strukturat publike sa i përket angazhimeve të tyre dhe private.
Ndërkohë që ndryshim tjetër i rëndësishëm është pikërisht dhe miratimi i një regjistri publik i cili do të garantojë akoma më shumë transparencë për këdo profesionistë të shëndetësisë që punon në strukturat publike shëndetësore lidhur me punësimin e tij dhe privatisht.
Ndërkohë nga ana tjetër kemi vendosur edhe një tavan të orëve të punës për të cilat një mjek që punon në sektorin publik mund të angazhohet dhe të punojë privatisht.
Ndërkohë që kemi bërë të qarta dhe procedurat për masat disiplinore dhe strukturat përkatëse të cilat do të rregullojnë veprimtarinë akoma më shumë të të gjithë profesionistëve të shëndetësisë që punojnë në sektorin publik.
Është e rëndësishme të theksojmë se të gjitha këto ndryshime vijnë dhe në vazhdën e reformës më të rëndësishme që është ajo e Autonomisë Spitalore, një reformë e cila ne besojmë fort që do të ndryshojë tërësisht mënyrën e shërbimit të ofrimit në kujdesin shëndetësor. Do të sjellë më pranë dhe më cilësisht shërbimin që strukturat publike shëndetësore ofrojnë për qytetarët dhe padiskutim që do të rrisin akoma më shumë dhe do të përmirësojnë mirëmenaxhimin e spitaleve dhe mirëmenaxhimin e profesionistëve të shëndetësisë.
