Me raportimin vjetor të kryetarit të KLSH në Komisonin për Ekonominë dhe Financat në Kuvend nuk ishte kritike vetëm mazhoranca, por edhe opozita. Sidomos në rastin kur kryetari i Kontrollit të Lartë të Shtetit, Arben Shehu, përmendi auditin e vitit 2021 ndaj veprimtarisë së AKU e ku pretendonte se ky institucion nuk kishte marrë asnjë masë ndaj një sasie akulloresh të sinjalizuara si të kontaminuara. Deputetja Jorida Tabaku sot në mbledhjen e komisionit duke iu referuar këtij rasti e quajti të gabuar atë që tha kreu i KLSH.
“Për mua kryetari i Kontrollit të Lartë të Shtetit bëri gabim që e solli atë rast. Bëri gabim, nuk duhet diskutuar ajo pas 3 vitesh. I di ai arsyet përse e solli. Duhet të na takonte ne ta lexonim këtë raport dhe të shikonim kush ka përgjegjësi”, tha Tabaku.
Deputetët e mazhorancës në komision e kundërshtuan që atë ditë kryetarin e KLSH, duke iu treguar reagimin e shpejtë të AKU sapo ishte sinjalizuar rasti. E po kështu një ditë më vonë vetë Autoriteti Kombëtar i Ushqimit shpjegoi hapat dhe veprimet e menjëhershme që ndërmori për këtë rast duke e tërhequr nga tregu sasinë e akulloreve të kontaminuara dhe duke e asgjësuar. Pavarësisht insistimit të deputetëve të PS-së në mbledhjen e Komisionit të Ekonomisë, kryetari i KLSH-së, Arben Shehu, nuk dha një shpjegim se përse foli për një çështje të 3 viteve më parë dhe për më tepër duke thënë një të pavërtetë se AKU s’kishte kryer asnjë veprim.
