Kandidati republikan presidencial, Donald Trump, bëri një hyrje triumfuese në konventën e partisë së tij në Milwaukee të hënën, dalja e parë publike që pas atentatit gjatë mitingut të tij në Pensilvani. Trump hyri në Forumin Fiserv në qendër të Milwaukee me një fashë në vesh ndërsa turma brohoriste “Lufto”.
Pasi përshëndeti zyrtarët e partisë, Trump u ul pranë kandidatit të tij për zëvendëspresident dhe senatorit të Ohajos, J. D. Vance. Trump nuk mbajti fjalim, por shfaqej herë pas here i prekur nga turma e mijëra njerëzve. Ai uli kokën në shenjë mirënjohjeje dhe tha disa herë: “Faleminderit të gjithëve”.
Konventa katërditore filloi më pak se 48 orë pasi një person i armatosur hapi zjarr në një tubim të Trumpit në Butler, Pensilvani, duke vrarë një mbështetës. Autori i armatosur u qëllua për vdekje dhe motivi i tij mbetet i paqartë. Kjo ngjarje ka ngritur hije dyshimi mbi shërbimet sekrete të cilat dështuan të mbronin ish-presidentin amerikan, Donald Trump. Shërbimi Sekret i Shteteve të Bashkuara ka konfirmuar se ka rritur masat e sigurisë për Trump pas sulmit ndaj tij në fundjavë.
