Një pushues është plagosur nga një gomone në gjirin e “Shën Janit” në Karaburun të Vlorës. Mësohet se 56-vjeçari, i cili mbeti i plagosur nga helikat e gomones, është nisur me helikopter drejt Tiranës. Sipas informacioneve, shtetasi A.K, ka pasur nevojë për mjekim më të specializuar dhe është transportuar drejt spitalit të Traumës.
56-vjeçari, banues në Tiranë u godit nga gomonia pasi kishte zbritur nga një anije turistike në det afër molit ku ankorohen mjetet e lundrimit. Drejtuesi i gomones është shoqëruar në polici për veprime të mëtejshme. Grupi hetimor vijon veprimet për zbardhjen e plotë të rrethanave të rastit.
