Shkrimtari dhe publicisti Fatos Lubonja komentoi protestën e opozitës duke u shprehur se ajo tregoi se ka ende njerëz që kanë një lloj shpirti opozitar.
I ftuar në emisionin “Open” në News24, Lubonja tha se ai vetë nuk ka shumë besim dhe nuk është optimist se protestat mund të ndryshojnë diçka në Shqipëri. Lubonja tha se protesta nuk është më instrument demokratik, sikundër ndodh në një vend demokratik.
“Në këtë vapë, me këtë lodhje, me këtë mërzitje, edhe sikur të dalin 50 vetë duhen falënderuar. Çështja e numrave nuk është më determinante. Numri tregon pushtet, ndonëse mendimi im është se edhe sikur të protestojnë 100 vetë, ka rëndësi”, - tha Lubonja.
Sipas publicistit, fakti që protestuesit u zhvendosën edhe para Bashkisë së Tiranës është shprehje e një zemërimi tjetër që ndoshta ka lidhje me skandalet që janë denoncuar. ©LAPSI.al
