Enkelejd Alibeaj është i mendimit që tashmë pa logon dhe vulën, grupi i Lulzim Bashës do duhet të krijojë një parti të re politike, joshëse për shqiptarët dhe sfiduese për Edi Ramën, siç e quan ai.
Në një intervistë në A2 CNN, me gazetaren Bruna Çifligu, Alibeaj tha se deri më tani në këtë betejë është i vetëm, por shtoi se kjo nuk do e ndalojë që të ecë përpara. Ai tha se krijimi i një partie të re politike është një detyrim që e kanë ndaj të gjithëve atyre që përgjatë 3 viteve luftë brenda Partisë Demokratike, ndoqën grupimin e tyre.
“Nuk kam qenë, qasja ime është qasje politike, nga moment i gjykatës së Apelit që padrejtësisht ia dha vulën dhe logon, Berishës, i vendosi një pritë dhe kufi përpjekjes sonë të përbashkët për të mos e lënë në duart e Berishizmit PD, unë kam mbajtur një qëndrim, do duhet ta vazhdojmë atë që quhet luftë apo betejë, dhe qëndrimi ynë në këto 3 vite, ka qenë do duhet të kemi një ofertë të re politike që të jetë joshëse ndaj shqiptarëve dje sfiduese ndaj Ramës, u largova nga grupi parlamentar i Sali Berishës dhe këto akte do doja që dhe kolegë të tjerë të mund t’i bënin. Nuk i imponoj qëndrimin tim askujt. Lëvizje politike me të gjithë ata që kemi mbajtur këtë qëndrim për 3 vite, për të mos i lënë ata pa një pikë referencë dhe për të krijuar një ofertë të re politike dhe elektorale”, tha ai.
Mirëpo, në këtë betejë duket se është edhe kundër Lulzim Bashës. Ndonëse nuk e artikuloi qartë, ai tha se është kundër “kryetarokracisë”, apo të individëve që mendojnë se “partia jam unë, e unë jam partia”. Mirëpo, nuk nguroi që të kishte një ftesë për të gjithë ata që ishin bashkë në betejën kundër Berishizmit.
“Unë distancohem nga praktikat dhe emrat konkret, sot unë Basha, Arbi Agalliu, Orjola Pampuri jemi thirrur për të bërë sakrificë, kemi këtë këto 3 vite, jemi sulmuar fizikisht e verbalisht, çdo individ që në mendjen e vetë e ka në mendje partia jam unë dhe unë jam partia, me mua nuk e bashkon asgjë, prandaj unë e kam një ftesë për të gjithë kolegët e mi”, tha Alibeaj.
Kur zgjedhjet e Himarës janë shumë afër, 4 gusht, apo edhe prag zgjedhjeve parlamentare, thirrja për krijimin e një partie të re është urgjente.
“Ndaj një orë me parë, me ide politike të djathta që mbështesin ligjmërinë e vlerave të të djathtëve, që largohen nga kryetarokracia, që të ofrojmë këtë lloj oferte apo siluetë të re politike elektorale”, tha ai.
A do të jetë ai që do të marrë një nismë të tillë, për të krijuar një parti të re? Alibeaj e mohoi duke thënë se kështu do të binte në “kurthin e Berishizmit dhe Ramizmit”.
