Bashkia e Tiranës do të shpenzojë me shumë se 3.5 milionë lekë të vjetra për një biletë vajtje-ardhje në Gjermani, për ndeshjen e parë të Kombëtares Shqiptare në EURO 2024.
Tenderi është hapur sot dhe është mbyllur po sot, brenda dy orësh.
Institucioni i drejtuar nga kryebashkiaku socialist Erion Veliaj ka kërkuar që nisja nga Tirana drejt Dortmundit të bëhet në datën 14.06.2024, në orën 13.10, dhe mbërritja në orën 15.50. Bashkia e Tiranës kërkon që fluturimi të jetë direkt, pra pa tranzit.
Çmimi i biletës me një drejtim, në këtë rast për vajtje do të jetë 148,000 lekë të reja (rreth 1.5 milionë te vjetra) dhe është fituar nga kompania ‘AMADEUS TRAVELL AND TOURS’.
Ndërkohë, kthimi nga Dusseldorf drejt Tiranës do të bëhet në datën 16.06.2024, në orën 20.00, dhe mbërritja në Tiranë është kërkuar të jenë në orën 00.55 (pas mesnate). Në çmim, specifikohet që të përfshira duhet të jenë dhe bagazhet e udhëtarit.
Çmimi i biletës me një drejtim, në këtë rast për kthim do të jetë 189,000 lekë të reja (rreth 1.9 milionë te vjetra) dhe është fituar nga kompania ‘VIVA O’.
Kjo biletë me vajtje në datë 14 Qershor (nesër) dhe kthim dy ditë më pas (më datë 16 Qershor), përkon me nisjen e Europianit dhe ndeshjen e parë të Kombëtares shqiptare, e cila do të jetë më datë 15 Qershor, pikërisht në Dortmund.
Shqipëria do të përballet me Italinë në ‘Signal Iduna Park’, në Dortmund më 15 qershor, ora 21:00. Ky takim do të jetë dhe i pari për kuqezinjtë në grupin B. Më pas Kombëtarja luan kundër Kroacisë më 19 qershor dhe ndaj Spanjës më 24 qershor.
Siç duket, kryebashkiaku Erion Veliaj ka vendosur që t'u bashkohet deputetëve të Kuvendit të Shqipërisë në Gjermani për të parë kuqezinjtë, të cilët edhe seancën plenare të së enjtes e zhvilluan të mërkurën, në mënyrë që të mos kenë asnjë angazhim tjetër dhe të shohin Kombëtaren.
Por ndryshe nga deputetët që do ta paguajnë vetë biletën për në Gjermani, kryebashkiaku Erion Veliaj e ka faturuar çmimin prej më shumë se 3.5 milionë lekësh të vjetra (pa llogaritur TVSH) në buxhetin e institucionit që drejton.
Dhe biletën ai e ka blerë 10 herë më shtrenjtë se çmimi i zakonshëm prej 350 eurosh që kushton vajtje-ardhje nga Tirana në Dortmund./Newsbomb.al
