Erion Veliaj tha sot se një opozitë që djeg goma, nuk bën dot asnjë punë, por veç të djegë Shqipërinë. Me dashje Veliaj harron vitet e opozitës së PS, kur po njësoj ata bllokonin rrugët në Shqipëri duke djegur goma. Nëse kthehesh pas në kronikat e kohës, gjen raportime të shumta të militantëve të PS nëpër Shqipëri teksa bllokonin rrugët kryesore të vendit me djegie gomash.
"Kush ka djegur vetëm goma, vetëm mund ta djegë Shqipërinë, dhe kush i ka veshur nënat me të zeza, vetëm mund t’i veshë akoma me të zeza”, tha Veliaj gjatë një takimi partiak në Tiranë.
Për t'i bërë qejfin shefit të tij, Veliaj foli për mandat të katërt të socialistëve vitin tjetër.
“Ne kemi të gjithë të drejtën e Zotit dhe të robit që, në vitin tjetër, t’i shohim njerëzit në sy dhe t’u themi: Kemi mbajtur çdo fjalë për këtë njësi”, tha Veliaj.
Kryebashkiaku i Tiranës është nën hetim pasuror nga SPAK bashkë me familjarët e tij. Ndërsa është marrë në pyetje për aferën e dosjes "5D" dhe skemën mafioze të vjedhjes me inceneratorët. ©LAPSI.al
