Ermal Dizdari, me profesion jurist në Bashkinë e Shkodrës është dhunuar mëngjesin e kësaj të enjteje teksa po shkonte për në punë.
Ngjarja ka ndodhur në orën 09:00, moment kur dy persona i kanë zënë rrugën dhe e kanë goditur me sende të forta dhe janë larguar nga vendi i ngjarës.
Dizdari është transportuar ne spitalin e Shkodrës ku ka marrë ndihmën mjekësorë.
Ndërkohë është zbardhur edhe dëshmia e tij, i cili ka thënë se dy persona i dolën para dhe më pas e sulmuan me levë. Dizdari ka thënë më tej se nuk i ka njohur agresorët.
Policia po heton për ngjarjen, identifikimin dhe kapjen e autorëve.
“Rreth orës 09:00, në lagjen “Salo Halili”, dyshohet se gjatë një konflikti, ka pësuar dëmtime fizike nga goditja me sende të forta, shtetasi E. D., 49 vjeç, i cili po merr ndihmë mjekësore në Spitalin Rajonal Shkodër. Shërbimet e Policisë kanë shkuar menjëherë në vendngjarje dhe vijojnë kontrollet për kapjen e autorit”- njoftoi policia për ngjarjen.
