Gjykata e Vlorës vendosi të lërë në burg dy punonjësit e hotelit "Greccia" në Dhërmi të akuzuar për “veprime që pengojnë zbulimin e së vërtetës” dhe “fshehje të kufomës”. Daniel Qose dhe David Larti akuzohen se kanë ndihmuar pronarin e tyre Gerald Shehu të zhvendosë dhe të fshehë trupin e recepsionistit të vrarë Erald Nevruzi.
Sipas prokurorisë ata fshehën provat pas kryerjes së krimit dhe gjithashtu kanë ndihmuar në mbështjelljen e trupit të viktimës me qese mbeturinash dhe futjen e tij në makinën e Shehut. Ata kanë zhdukur të gjitha provat e vrasjes, duke djegur sendet personale, telefonin dhe rrobat e 31-vjeçarit në furrën e picerisë.
Para gjykatës, dy të rinjtë nga Korça kanë shfaqur pendesë dhe kanë përsëritur se të gjitha veprimet i kanë bërë pasi pronari i ka kërcënuar me armë. Pas arrestimit, ata patën deklaruar në polici, se vrasja ka ndodhur pas një konflikti mes autorit dhe viktimës. Sipas tyre Shehu e qëlloi Nevruzin me dy plumba tek shkallët e hotelit. Pas krimit Greald Shehu u largua menjëherë nga vendi ynë nëpërmjet pikës së Kalimit Kufitar të Qafë Botës për të kaluar drejt Greqisë.
Pas kësaj ai shkoi në Igumenicë e më pas me traget drejt Korfuzit. Ai tentoi të shfrytëzonte aeroportin e ishullit për të udhëtuar drejt Anglisë, por në këtë aeroport është vënë në pranga nga policia vendase. Nga hetimet e deritanishme thuhet se dy janë motivet kryesore, një për konflikt banal i çastit dhe tjetra për shkak të një njohjeje të mëparshme dhe përfshirje në aktivitete të paligjshme në Angli. LAPSI.al
