Hekurudha Shqiptare po kërkon kompaninë që do të ndërtojë stacionet e trenit përgjatë linjës hekurudhore Tiranë – Durrës dhe degëzimin e ri drejt aeroportit të Rinasit. Procedura e prokurimit publik është publikuar në faqen e Bankës Evropiane për Rndërtim dhe Zhvillim, si një nga bankat që ka akorduar kredi për këtë vepër hekurudhore, ndërsa kompanitë e interesuara duhet të depozitojnë ofertat e tyre deri në datën 9 korrik.
Ndërtimi i godinave të stacioneve është një nga komponentët, që nuk është përfshirë në punimet që po kryhen aktualisht për ndërtimin e kësaj linje hekurudhore dhe për këtë aryse po tenderohen të ndara.
Ndërkohë, vetëm pak ditë më parë u bë me dije se aktualisht kanë përfunduar 70% e volumit të punimeve dhe 90% e veprave të artit. Po ashtu, u njoftua se punimet parashikohet të përfundojnë në mars të vitit 2025.
Gjithsesi, përveç stacioneve janë edhe 2 komponentë të pritet të plotësohen në vijim. Bëhet fjalë për elektrifikimin e kësaj linje, si dhe zgjatimin për në bulevardin e ri, ku ka qenë stacioni përpara prishjes së tij.
Kjo, pasi projekti aktual përfshin ndërtimin e linjës hekurudhore, deri në stacionin e Kasharit. Paralelisht, pritet edhe vendimi i qeverisë për shpronësimin e pronarëve që preken nga zbatimi i projektit e që kryesisht janë të pozicionuar përgjatë degëzimit të ri që shkon drejt aeroportit të Rinasit.
Vënia në funksion e kësaj linje pritet t’i japë një hov transportit hekurudhor në Shqipëri, duke sjellë jo vetëm ulje të kostove të transportit për udhëtarët dhe mallrat, por edhe ulje të ndjeshme të emetimeve të gazeve me efekt serrë e rrjedhimisht përfitime mjedisore dhe shëndetësore./Scan Tv
