Kryeministri Rama ka dhënë një prononcim për Financial Times për marrëveshjen e strehimit të refugjatëve që nisen drejt brigjeve të Italisë, ku ka zbuluar se kryeministri i Britanisë së Madhe, Boris Johnson i propozoi strehimin e refugjatëve afrikanë, por Rama ka refuzuar. Dihet se më pas, Britania e Madhe bëri një marrëveshje me Ruandën ku sundon Pol Kagame.
Rama siguron se nuk do të ketë një marrëveshje tjetër me vende të tjera europiane përveç Italisë, ndërsa ka zbuluar për FT ofertat e tjera që i kanë ardhur.
“Është një herë, 100 për qind një herë”, shprehet Rama në intervistën për Financial Times. Ai thotë se qeveritë e tjera i ishin drejtuar për të parë nëse mund të përsërisnin marrëveshjen me Italinë. "Unë thashë "Jo". Sepse nuk ka kuptim për mua. Italia është shumë e veçantë për ne, më shumë se një marrëdhënie strategjike. Është një miqësi e rrënjosur thellë.” Rama tha se marrëveshja me Italinë bazohej në një histori të gjatë të ndihmës për zbatimin e ligjit – përmes rojes bregdetare italiane, që ndihmoi Shqipërinë të kontrollonte emigracionin në vitet 1990 dhe përpjekjet më të fundit të përbashkëta kundër kontrabandës së drogës" shkruan Financial Times.
“Boris Johnson më telefonoi dhe më tha, ju komplimentoj për udhëheqjen tuaj, le të bëjmë diçka së bashku”, kujtoi Rama. “Le të kemi një marrëveshje që Britania të sjellë në Shqipëri emigrantët e paligjshëm për t'i mbajtur atje, për t'i përpunuar. Unë thashë, më falni, kjo nuk është e mundur” citon Financial Times duke vazhduar se ndryshe nga marrëveshja italiane, e cila është për strehimin deri në 3,000 njerëzve në të njëjtën kohë, oferta e Mbretërisë së Bashkuar nuk ishte "një numër fiks".
“Ishte për të gjithë ata që vijnë në Britani. . . si një tranzit. Unë thashë se nuk ka asnjë mënyrë. Pastaj, kishim të tjera që nuk do t'i përmend. Ndër vendet më të pasura në Evropë.” thotë Rama në prononcimin e tij për FT.
