Gjykata e Lartë ka rrëzuar rekursin e ish-Kryeministrit Sali Berisha, i cili kërkonte nga kjo gjykatë, heqjen e ndalimit për të marrë pjesë në seancat parlamentare, ndërsa ndodhet në arrest shtëpie me vendimin të GJKKO-së, prej 30 dhjetorit 2023, lidhur me hetimin e SPAK për privatizimin e ish-klubit Partizani.
Gjithashtu nga e njëjta Gjykatë nuk është pranuar edhe rekursi i Jamarbër Malltezit që kundërshton masën arrest në shtëpi, vendosur nga apeli i posaçëm më 21 nëntor të vitit të shkuar.
Berisha e Malltezi kanë kundërshtuar masat e sigurisë të vendosura nga GJKKO, duke i cilësuar ato si politike dhe të vendosura me ndikimin e Edi Ramës. Fillimisht ndaj Berishës u kërkua masa “detyrim paraqitje” dhe ndalim të daljes jashtë vendit, por ato nuk u respektuan, me pretendimin se SPAK nuk kishte marrë leje nga Kuvendi/
Më pas ishte SPAK që kërkoi leje nga Kuvendi, por duke forcuar masën e sigurisë nga detyrim paraqitjeje në “arrest shtëpie”.
Me masën e sigurisë së arrestit shtëpiak, Berishës iu ndalua të marrë pjesë në seancat plenare, çka mund të çojë në humbjen e mandatit të deputetit, pasi mungon në punimet e Parlamentit prej pothuajse 6 muajsh.
Avokatët e Berishës kanë deklaruar se vendosja në masë arresti synon pikërisht djegien e mandatit të deputetit.
Ish-Kryeministri i është drejtuar me disa kërkesa shkallëve të gjyqësorit shqiptar, por të gjitha janë rrëzuar.
