Ish-kryeministri Sali Berisha komentoi në tubimin e përnatshëm me mbështetësit e tij edhe thirrjen në SPAK të zëvendëskryeministres Belinda Balluku e cila u pyet për inceneratorin e Tiranës. Berisha tha SPAK ka në dosje dy shkresa nga Balluku për Erion Veliajn, por prokuroria po vepron si mercenare.
“Sot Skrapi i partisë thirri Belinda Ballukun. E thirri. Ua them unë. Shikoni taktikën e mercenarit. Arreston hajdutë të vegjël dhe u thotë qeveritarëve, i thotë Erion Veliajt, se po arrestoj hajdutët që të kanë vjedhur ty. Po ka hajdut në botë si Erion Veliaj? Ai nuk e meriton të rrijë asnjë sekondë në bashki. Ndaj dhe e marta duhet të jetë dita e fundit të tij.
E thirrën Belindën sot në një kohë kur kanë në dosje dy shkresa në të cilat i thotë Erion Veliajt se ke detyrë të mbikëqyrësh dhe të raportosh për çdo punim të bërë në djegësin e Tiranës. Të mbikëqyrësh njësinë e mbikëqyrjes, të raportosh situacionet, shpenzimet dhe çdo gjë.
Po pse Erion Veliaj nuk e vuri një ditë të vetme në punë njësinë e mbikëqyrjes? Sepse paratë nuk duhet të mbikëqyreshin, por të vidheshin. Sepse nuk duhej të bëhej punë, por duhej që paratë të vidheshin. A ka hipokrizi më të madhe se kjo që bën Skrapi i partisë, afërmendshi i Edi Ramës?” – tha Berisha.
LEXO EDHE: Dëshmia e Ballukut/ Kë dogji në SPAK për inceneratorin e Tiranës?
Ish-kryeministri bëri akuza të forta ndaj kryebashkiakut Veliaj për çështjen e inceneratorit të Tiranës.
“Qytetarë, mos harroni kurrë se prapa 130 milionë eurove të zhdukura për djegësin e Tiranës, prapa vjedhjes 100% në tenderat e bashkisë, prapa vjedhjeve të 1.1 miliard eurove me çmimet të 5-fishta të ndërtimit të rrugëve në vit, me çmime të 10-fishta të ndërtimit të rrugëve në vit, me çmime të dhjetëfishta në ndërtimin e shkollave dhe të çdo pune publike, qëndron bllokimi i rritjes së rrogave tuaja, qëndron bllokimi i rritjes së pensioneve tuaja, qëndron ndërprerja e subvencioneve për fermerët, qëndrojnë tarifat e larta për studentët, qëndron shumëfishimi i taksave për profesionet e lira, qëndrojnë pra të gjitha të zezat që solli Rilindja për qytetarin shqiptar, më të cilat ai e rrokullisi nga qytetari më i mirëpaguar, në qytetarin më të keqpaguar të Ballkanit” – tha Berisha. ©LAPSI.al
