Emisioni investigativ “100 minuti” që transmetohet çdo të hënë në televizionin italian “La7 i kushtoi vëmendje këtë të hënë historisë së Ousmane Sylla, një 21-vjeçari emigrant nga Guinea Bisau që në 4 shkurt të këtij viti u vetëvra në një nga Qendrat e Përhershme të Riatdhesimit (CPR) në Ponte Galeria në periferi të Romës.
Ai vari veten në një nga grilat e dritares për shkak të dhunës që kishte pësuar në këto qendra. I riu kishte denoncuar dy herë keqtrajtimin dhe pas një zhvendosjeje të përkohshme autoritetet e kishin rikthyer në qendrën e mëparshme ku ai ishte i sigurt se e priste hakmarrja e dhunuesve. “Nëse një ditë do të vdisja, do të doja që trupi im të çohej në Afrikë. Nëna ime do të ishte e lumtur(…). Paqe shpirtit tim, u prehtë në paqe” – shkroi ai në murin e qendrës së pritjes.
Kjo ngjarje shkaktoi reagime të shumta në Itali dhe madje edhe protesta që kërkuan mbylljen këtyre qendrave për shkak të trajtimit çnjerëzor të emigrantëve. Në emision u dhanë dëshmi të shumta për dhunën dhe keqtrajtimet në këto qendra.
Pikërisht të tilla qendra do të ndërtohen edhe në Shqipëri në bazë të marrëveshjes Rama - Meloni. Emisioni ngriti pikëpyetje të forta se si do të respektohen të drejtat e njeriut në qendrat shqiptare kur autoritetet italiane kanë dështuar ta bëjnë këtë në Itali.
Megjithatë ministri i brendshëm i Italisë, Matteo Piantedosi u shpreh i vendosur për ta çuar përpara projektin e Gjadrit dhe Shëngjinit edhe pse për të do të shpenzohen 1 miliard euro.
“Për në është një investim i madh. Pse? Sepse të këmbëngulësh për atje është dhe një mënyrë për të parandaluar trafiqet e paligjshme dhe sepse ne e kemi përcaktuar që personat vulnerabël të mos i çojmë në Shqipëri” – tha ministri i brendshëm italian në La7.
Por emisioni i gazetares Chiara Proietti d'Ambra hodhi dyshime të forta se trajtimi i emigrantëve është kthyer në një biznes edhe në Itali dhe që vlen miliona euro dhe ku janë të përfshirë biznese lokale, por edhe ndërkombëtare. ©LAPSI.al
