Kryeministri shqiptar Edi Rama sulmoi me fjalët më të ashpra emisionin investigativ “Report” të RAI 3 ku trajtohej marrëeshja mes Shqipërisë dhe Italisë, por edhe aspekte të tjera të lidhjeve të qeverisë me krimin, drejtësisë dhe korrupsionit. Në reagimin e parë që Rama dha për shqiptarja.com tha se kjo ishte “shpifja më skandaloze për Shqipërinë”.
Rama thotë se RAI është një ekran që paguhet nga taksat e italianëve “dhe që u angazhua në një episod të turpshëm baltosjeje të Shqipërisë, siç ndodhte në vitet kur në median italiane shqiptarët shfaqeshin vetëm si vrasës, trafikantë, prostituta dhe hajdutë, ndërsa Shqipëria si foleja e krimit në Europë!”. Në këtë reagim të parë dhe në një tjetër më të gjatë të dhënë më pas në një intervistë të gjatë që mori 1/3-ën e edicionit qëndror të lajmeve në Top Channel, Rama u ankua se RAI3 kishte censuruar sekretarin e tij të përgjithshëm Engjëll Agaçi duke mos publikuar përgjigjet e tij të dërguara me shkrim për gazetarin italian Giorgio Mottola.
“Aty është trumbetuar që sekretari i përgjithshëm i Kryeministrisë që është një figurë institucionale dhe i cili ishte viktima e atij agresioni të pashembullt refuzuar të përgjigjet... ka kthyer përgjigjet pikë për pikë, pyetje për pyetje, në të njëjtën adresë nga ato pyetje i kanë ardhur dhe në afatin e kërkuar nga dërguesi në mënyrën më të paimagjinueshme pasi flet në atë emision skandaloz, del edhe në kanalet e ujërave të zeza këtu në Shqipëri dhe vazhdon të thotë që askush nga viktimat e tij nuk i ka dhënë asnjë prononcim” – tha Rama në Top Channel.
Këtyre akuzave të Ramës u është përgjigjur drejtuesi i emisionit Report, Sigfrido Ranucci. Në një reagim në profilin e tij në Facebook ai thotë se të dielën e ardhshme do të ketë sërish vëmendje për Shqipërinë. Ranucci thotë se në këtë puntatë do të transmetohen edhe përgjigjet e Agaçit që sipas tij konfirmojnë se ka qenë avokat i narkotrafikantëve.
“Report përgjigjet se Agaçi në përgjigjet e tij me shkrim për korrespondentin tonë Giorgio Mottola, të cilat do të publikohen në profilin e Report, ka konfirmuar se ka qenë avokat i disa trafikantëve të drogës dhe se ka bashkëpunuar në hartimin e protokollit ndërmjet Shqipërisë dhe Italisë. I detyrohesha shumë në emër të së vërtetës. Ne do t'i kthehemi çështjes së emigrantëve të dielën e ardhshme. Emisioni transmetohet çdo të diel në Rai3 në orën 20:55” - shkruan gazetari italian. ©LAPSI.al
LEXO EDHE: Investigimi i Raitre/ Pse e kërcënoi Rama gazetarin italian
