Plani i qeverisë britanike për transferimin e azilkërkuesve që mbërrijnë ilegalisht në Mbretërinë e Bashkuar drejt Ruandas ka marrë dritën jeshile nga parlamenti, pas një loje ping-pongu midis Dhomave të Lordëve dhe Komunave që zgjati deri në orët e vona të natës. Tani projektligji është bërë ligj. Por OKB-ja sapo ka paralajmëruar: "Do të ishte një precedent i rrezikshëm".
Projekti i kryeministrit Rishi Sunak dhe konservatorëve do t'i detyrojë gjyqtarët ta konsiderojnë Ruandën një "vend të sigurt". Ndërkohë që zyrtarët që përpunojnë kërkesat për azil do të jenë në gjendje të injorojnë pjesë të ligjit ndërkombëtar dhe vendas për të drejtat e njeriut për të shmangur një vendim të Gjykatës së Lartë britanike që thotë se dëbimi i emigrantëve në Kigali është i paligjshëm.
Për të marrë dritën jeshile, qeverisë britanike iu desh të përballej me një betejë të ashpër parlamentare. Dhoma e Lordëve e kritikoi projektligjin si të pamjaftueshëm, duke vënë në dukje se Ruanda nuk mund të konsiderohej e sigurt derisa një organ i pavarur monitorues të thoshte se ishte kështu. Deputetët në Dhomën e Komunave, ku konservatorët kanë shumicën, votuan kundër çdo amendamenti dhe u kërkuan lordëve të mendojnë përsëri në një proces të njohur si "ping pong parlamentar".
Dhoma e sipërme e pazgjedhur, ku nuk ka shumicë absolute për asnjë parti, këmbënguli në qëndrimet e saj. Por pak para mesnatës lordët iu dorëzuan vullnetit të deputetëve të zgjedhur dhe ranë dakord të mos bënin ndryshime të tjera, duke i dhënë fund ngërçit dhe duke u siguruar që projektligji tani do të marrë miratimin mbretëror për t'u bërë ligj.
OKB: "Plani i Ruandës do të ishte një precedent i rrezikshëm"
Menjëherë pas miratimit parlamentar, Kombet e Bashkuara ftuan Britaninë të rishqyrtojë planet për dëbimin e azilkërkuesve në Ruandë, duke paralajmëruar se projekti kërcënon sundimin e ligjit dhe përbën "një precedent të rrezikshëm në nivel global". Komisioneri i Lartë për të Drejtat e Njeriut, Volker Türk dhe homologu i tij përgjegjës për refugjatët, Filippo Grandi, i kanë bërë thirrje qeverisë së Sunak "të marrë masa praktike për të luftuar flukset e parregullta të refugjatëve dhe emigrantëve, bazuar në bashkëpunimin dhe respektimin e ligjit ndërkombëtar për të drejtat e njeriut”.
