Ambasada Amerikane dhe ajo Britanike reaguan thuajse njëzëri në mbrojtje të SPAK-ut dhe Altin Dumanit pas sulmeve të Ilir Metës.
Ambasada e SHBA përmes një postimi në platformën X, shprehet se mbështet dënimin që KPL i bëri këtyre sulmeve dhe shprehet se qëndron krahë profesionistëve të drejtësisë që kërkojnë t’i japin fund pandëshkueshmërisë.
Reagimi i ambasadës amerikane:
“Përshëndesim dënimin nga KLP të sulmeve të drejtpërdrejta dhe të tërthorta kundër SPAK-ut në ditët dhe javët e fundit. Do të vazhdojmë të qëndrojmë në krah të shumicës dërrmuese të qytetarëve shqiptarë që mbështesin institucionet e reja të drejtësisë dhe rolin kyç që ato luajnë në demokracinë e Shqipërisë. SHBA qëndron në krah të profesionistëve të drejtësisë që respektojnë ligjin dhe do të mbështesë të gjithë ata që kërkojnë t’i japin fund pandëshkueshmërisë”, shkruan ambasada e SHBA.
Ambasadori i Britanisë së Madhe në Shqipëri Alastair King-Smith, shprehet se “në Shqipëri duhet t’i jepet fund pandëshkueshmërisë, në interes të qytetarëve”.
Lexo më tej: Ilir Meta sharje ndaj Altin Dumanit “Nuk jam legen si ty”
Reagimi i ambasadës britanike:
Ambasadori britanik, Alastair King-Smith përsëriti mbështetjen e fortë të Mbretërisë së Bashkuar për Prokurorinë e Posaçme të Shqipërisë, SPAK dhe përpjekjet saj jetike për përmirësimin e llogaridhënies dhe për t’i dhënë fund pandëshkueshmërisë në interes të të gjithë qytetarëve shqiptarë.
Ambasadori konfirmoi në takimin e përbashkët të donatorëve të SPAK, javën e kaluar, angazhimin e Mbretërisë së Bashkuar për të ofruar asistencë shtesë dhe ngritjen e kapaciteteve për punën e SPAK, në përputhje me Memorandumin e Mirëkuptimit të nënshkruar nga kryeprokurori i posaçëm, Altin Dumani dhe Agjencia Kombëtare kundër Krimit (NCA), si dhe hetimet e përbashkëta me agjencitë e tjera ligjzbatuese të Mbretërisë së Bashkuar.
©LAPSI.AL
Lexo më tej: Meta shpërthen ndaj Dumanit: Ke çuar edhe njerëz të më mbushin mendjen të iki nga Shqipëria
