Banka Botërore parashikon që rritja ekonomike e Shqipërisë në vitin 2024 do të vijojë të qëndrojë në nivelin 3.3 %. Dhe për të shkuar më tej, do të nevojitet një transformim madhor i ekonomisë ndaj një produktiviteti më të lartë dhe pagave më të larta.
“Duhet transformim madhor i ekonomisë ndaj një produktiviteti më të lartë dhe vende pune me paga më të larta. Sektori privat në Shqipëria ka një nivel të ulët inovacioni, kapitali njerëzor është i nënpërdorur dhe jo i fuqizuar.
Kërkohen më shumë njohuri ndaj burimeve njerëzore dhe tani për tani nuk e shohim këtë. Aktualisht Shqipëria ndodhet në një fazë rreziku që të arrijë në një gjendje të rrafshët e për të mos pasur mundësinë për të kapërcyer në një nivel më të lartë”, tha Emanuel Salinas, menaxher i Bankës Botërore për Shqipërinë.
Edhe gjatë këtij viti, Banka Botërore parashikon që turizmi do të jetë promotor i rritje ekonomike.
“Shërbimet do të jenë nxitësi kryesor i rritjes ekonomike. Turizmi do luajë rol kryesor si dhe aktiviteti i pasurive të paluajtshme dhe ndërtimit”, tha Hilda Shijaku, ekonomiste e lartë e BB në Shqipëri.
Banka Botërore ka prezantuar raportin e rregullt ekonomik për vendet e Ballkanit Perëndimor, ku sa i takon Shqipërisë evidentohen rrisqe që lidhen me ciklet elektorale dhe nevojat fiskale që nevojiten për të kompensuar rritjen e kostove të jetesës.
