Ish-deputeti i PD-së Belind Këlliçi thotë se çdo ditë po vijnë denoncime për afera korruptive në qeveri apo dhe bashkinë e Tiranës. Në emisionin “Të Paekspozuarit” ai tha se ditën e arrestimeve në Bashkinë e Tiranës, ky institucion i ka dhënë tender kompanisë së ish-drejtorit të ARRSH-së, Evis Berberi.
“Më vjen një informacion, një dokument dhe më rezulton se nga publikimet e Agjencisë së Prokurimeve Publike-së sot se në datën 28 mars, ditën kur janë bërë arrestimet në ARRSH, ka lidhur një marrëveshje, një tender dhe fitues e dini se cili bashkim operatorësh është fituese këtij tenderi?
Është kompania “DAAM” dhe Net Group e Evis Berberit, drejtorit të Belinda Ballukut që është në burg. Dmth, bashkia e Tiranës, drejtorët e së cilës janë në burg, i kanë dhënë një tender kompanisë së një tjetër drejtori që është në burg. Publikimi është bërë sot në faqen e APP-së. Është vetëm një denoncim që duhet verifikuar” – tha Këlliçi.
Kompania DAAM ishte krijuar në tetor 2017 nga Valter Begaj pronar dhe Ervis Lami administrator. Një vit më pas, në shtator 2018 kompaninë e bleu Evis Berberi për 100 mijë lekë, i cili i ndërroi emrin. 4 muaj më vonë Berberi u bë këshilltar i ministres Balluku ndaj e shiti kompaninë tek Brunilda Buli në vlerën e 500 mijë eurove.
Se çfarë kishte bërë kompania për 4 muaj që të vlente 600 herë më shumë është e pashpjegueshme. Në dhjetor 2021, Buli e shet kompaninë te Valter Begaj për rreth 1.7 milionë eurove. Begaj sapo merr pronësinë emëron administrator Lamin. 2 muaj më pas Begaj bën shitblerje me Lamin po 1.7 milionë euro ndërsa pa mbushur muajin e rimerr nga Lami me zero lekë.
Por paralelisht me lëvizjet në kompaninë DAAM, Valter Begaj, njeriu i Berberit në kompani, kishte edhe një firmë tjetër të quajtur ‘Net-Group’ shpk, e cila në periudhat kur Berberi ishte në pozicione drejtuese merrte tendera të majmë nga institucionet shtetërore.
Pra Berberi i jepte tendera kompanisë së Begajt dhe Lamit dhe këta të fundit ia kthenin përmes vlerave monetare në kompaninë DAAM. Këto vlera monetare të përfituara në mënyrë të parregullt, Berberi i ka investuar në veprimtarinë ekonomike për blerjen e pasurive të paluajtshme në emër të kompanisë DAAM. ©LAPSI.al
