Presidenti i Bjellorusisë, Aleksandër Lukashenko tha sot se Bjellorusia po përgatitet për luftë, megjithëse, siç tha ai, dëshiron paqe dhe nuk dëshiron të luftojë kundër asnjë vendi.
Lukashenko tha se thënia: “Nëse doni paqe, përgatituni për luftë” është e vërtetë, njoftoi uebfaqja e presidentit bjellorus.
Lukashenko theksoi se Bjellorusia nuk kërcënon askënd në asnjë mënyrë dhe nuk dëshiron territoret e njerëzve të tjerë.
Ai tha se në Bjellorusi po kryhet trajnimi i nevojshëm i njësive përkatëse dhe se trupat po furnizohen me lloje të ndryshme të armëve dhe pajisjeve.
Sipas tij, përderisa kritikat vijnë nga vendet armiqësore, kjo do të thotë se Bjellorusia po bën gjënë e duhur. Ai tha se do të ishte një fatkeqësi nëse Bjellorusia merrte lëvdata nga, siç tha ai, vendet armike.
