Në datën 6 mars një ngjarje e rëndë u raportua në Durrës ku sipas raportimit të policisë, një 39 vjeçar kishte hedhur nga ballkoni i hotelit një vajzë nga Barcelona.
Menjëherë pas kësaj vajzat e tjera që po strehoheshin aty tentuan të iknin, mirëpo u kapën nga policia dhe u zbulua se në fakt kjo godinë shërbente si një shtëpi publike, ku konsumohej edhe lëndë narkotike.
Policia ka njoftuar sot se ka arrestuar 39 vjeçarin Ismet Zoto, pasi akuzohet se shfrytëzonte për prostitucion, 23 vjeçaren dhe 4 të tjera të huaja, në një banesë me qira, në lagjen nr. 2, ku gjithashtu konsumoheshin lëndë narkotike.
“Më herët, për rastin u proceduan penalisht 5 shtetaset e huaja.
Si rezultat i veprimeve hetimore, të kryera në drejtimin e Prokurorisë së Durrësit, për të përcaktuar plotësisht autorësinë dhe rrethanat e mbajtjes së një banese në lagjen nr. 2, Durrës, për prostitucion dhe për konsumim të lëndëve narkotike, specialistët e Seksionit për Hetimin e Trafiqeve të Paligjshme të DVP Durrës ekzekutuan urdhrin e Prokurorisë, për ndalimin e shtetasit I. Z., 39 vjeç, banues në Shijak.
Në lidhje me rastin, për këtë shtetas është caktuar masa e sigurisë “Arrest në burg”, për veprën penale “Shfrytëzimi i prostitucionit”, thuhet në njoftim.
