Një grup opozitar në Serbi nisi një peticion të hënën kundër projektit të zhvillimit të pasurive të paluajtshme që do të financohet nga firma e dhëndrit të Donald Trump, Jared Kushner, në vendin e ish-selisë së ushtrisë serbe të shkatërruar nga fushata e bombardimeve të NATO-s në 1999. Më herët gjatë këtij muaji, Kushner konfirmoi lajmet se kompania e tij ka në plan të financojë projektin në qendër të Beogradit.
Ai do të ketë një hotel të lartë, një kompleks apartamentesh luksoze, hapësira për zyra dhe dyqane. Peticioni i kërkon qeverisë së Serbisë të respektojë ligjin, i cili thotë se ndërtesa mund të kthehet vetëm në funksionin e saj origjinal. Ai gjithashtu kërkon që Muzeu i Historisë Serbe të krijohet atje.
“Ndërtimi i një hoteli në vendin e kësaj godine është i paligjshëm dhe përfaqëson shkatërrimin e dinjitetit tonë”, - tha lëvizja opozitare Kreni-Promeni (Lëviz-Ndrysho). Në deklaratë thuhet se 10 mijë njerëz nënshkruan peticionin në më pak se 24 orë. Zyrtarët e qeverisë pro-Trump në Serbi e kanë mirëpritur projektin, por opozita dhe shumë në publikun e gjerë janë shprehur kundër tij.
Për shumë njerëz, vendi i ndërtesës së komandës së ushtrisë të bombarduar është një simbol i fuqishëm i rezistencës së Serbisë kundër asaj që ata e quanin agresion të NATO-s 25 vjet më parë.
AP kujton se forcat serbe luftuan në 98-99 me separatistët shqiptarë etnikë në Kosovë, e cila atëherë ishte një krahinë serbe. Rreth 13 mijë njerëz, kryesisht shqiptarë etnikë, vdiqën derisa një fushatë 78-ditore e bombardimeve të NATO-s, e udhëhequr nga SHBA, i largoi trupat serbe nga Kosova.
Kosova shpalli pavarësinë në vitin 2008, por qeveria në Beograd nuk e njeh fqinjin e saj si një vend më vete. Në fillim të këtij muaji, ministria shqiptare e turizmit pranoi se kishte marrë një aplikim për projekt investimi nga firma e Kushner, Affinity Partners, për të kthyer një ish-bazë ushtarake në ishullin e Sazanit në detin Adriatik në një vendpushim. Kryeministri Edi Rama tha se Shqipëria është krenare që ka tërhequr një interes të tillë. ©Marrë nga Associated Press, përshtati në shqip LAPSI.al
