Është dënuar me 3 vite burg, Rei Meta, autori i vrasjes me grusht të Armando Meshaut. Autori është dënuar për veprën penale “vrasje nga pakujdesia” neni 85 , atë që kërkoi prokurori Arjan Xhaferraj.
Prokurori kërkoi 3 vjet e 6 muaj për djalin e Nurihan Metës, anëtares së Këshillit të Lartë të Prokurorisë.
Familjarët e Meshaut kanë kërkuar që ndaj tij të ishte akuza e vrasjes me dashje, por kërkesa është rrëzuar. Të pranishëm në sallë gjatë procesit ishin avokatët e të riut dhe babai i tij. Ngjarja e rëndë ndodhi në një pikë interneti në qytetin e Vlorës në gusht të vitit të shkuar.
Pas debateve, Rei Meta goditi me grusht inxhinierin, i cili përfundoi në tokë duke gjetur vdekjen. Autori dhe viktima kishin përplasje mes tyre prej 7-8 muajsh para ngjarjes. Sipas informacioneve nga hetimet, Rei Meta bënte rolin e sekserit për një pronë për të cilën nuk mbaroi punë.
Viktima e kishte zgjidhur me palë të treta, por Meta pretendonte që për “punën” ndërtuesi duhet t’i jepte një apartament, të cilin ai nuk pranoi t’ja kalonte në pronësi. Mësohet se Meta premtonte që t’u mbaronte punë qytetarëve në emër të së ëmës, Nurihan Metës, anëtare e KLP-së.
