Nga takimi me Shoqatën e Investitorëve të Huaj në Shqipëri, ministrja e Infrastrukturës dhe Energjisë, Belinda Balluku ka komentuar lajmin për rezervat e hidrogjenit në Bulqizë. Ajo tha se duhen pritur studimet për të kuptuar se sa është sasia.
“Por dua të falënderoj Qeverinë Gjermane për një mbështetje të jashtëzakonshme që po na jep dhe një grup ekspertësh i cili do të dërgohet këtu nga Ministria e Ekonomisë, do të qëndrojë në atë zonë minerare për të studiuar nga afër të gjitha kapacitetet e hidrogjenit në Shqipëri”, tha Belinda Balluku, ministre e Infrastrukturës dhe Energjisë duke zgjedhur të mos mbajë asnjë reagim për Ervis Berberin, njeriun e saj të afërt i cili u arrestua nga SPAK për korrupsion.
Arrestimi i kreut të ARRSH ndodhi një ditë më parë. Deri më tani s'ka asnjë reagim nga qeveria për këtë goditje. Sipas SPAK, Berberi ka përfituar miliona euro nga tenderat e ARRSH dhe Agjencisë së Eficencës së Energjisë përmes kompanive të lidhura me të. ©LAPSI.al
