Dy shqiptarë përkatësisht të moshave 22 dhe 19 vjeç, janë arrestuar ditën e sotme në Pavia të Italisë. Mësohet se këta të rinj kishin përdorur dhoma për kultivimin e kanabisit me një sistem të sofistikuar të ngrohjes dhe ndriçimit.
Bëhet me dije se tek dhomat janë gjetur 300 bimë kanabisi të pjekura dhe 300 të tjera në fazën e rritjes dhe së bashku peshonin 720 kilogramë. Për më tepër për kushtet e rritjes së tyre shqiptarëve u është dashur të vjedhin energjinë elektrike.
Ata kishin krijuar lidhje të paligjshme të energjisë elektrike me një konsumim ditor prej 150kW. Pasi u lokalizuan ata u kapën dhe u vunë menjëherë në pranga nga policia italiane.
