Aktivisti i opozitës ruse Leonid Volkov, i cili ka qenë ish-shefi i shtabit të liderit të ndjerë të opozitës ruse Alexey Navalny, është sulmuar jashtë shtëpisë së tij në Lituani. Volkov u sulmua me një çekiç dhe gaz lotsjellës, ndërsa ishte në makinën e tij në Vilnius të martën mbrëma, tha zëdhënësja e Navalny Kira Yarmysh, raporton Reuters.
“Volkov është sulmuar jashtë shtëpisë së tij. Dikush i theu xhamin e makinës dhe i hodhi gaz lotsjellës në sytë e tij, pas së cilës sulmuesi filloi ta godiste Leonidin me një çekiç”, shkroi ajo në X.
Ajo postoi imazhe që tregonin Volkovin me një mavijosje në ballë dhe një automjet me derën dhe dritaren e dëmtuar. Ministri i Punëve të Jashtme të Lituanisë, Gabrielius Landsbergis e quajti sulmin “tronditës”.
“Autorët do të duhet të përgjigjen për krimin e tyre”, shkroi ai në X. Policia lituaneze po heton incidentin. Volkov ka jetuar jashtë Rusisë për disa vite për sigurinë e tij dhe ka shërbyer si shefi i shtabit të Navalny-t derisa lideri i opozitës vdiq papritur në një burg në Arktik muajin e kaluar, ku po vuante dënimin për akuza që ishin të motivuara politikisht.
Volkov përballet gjithashtu me akuza të ndryshme të motivuara politikisht në Rusi. Një tjetër anëtar i ekipit të Navalny, Ivan Zhdanov postoi fotografi në mediat sociale të Volkov këmbën e majtë të përgjakur dhe tha: “Sigurisht që ky është një sulm i qartë politik, këtu nuk ka dyshim”.
