Kryeministri Edi Rama ka vizituar qytetin e Shkodrës dy ditët e fundjavës. Gjatë takimeve me socialistët, Rama ka dhënë porositë e tij për hapjen e partisë dhe për të shtuar anëtarët në PS.
“Duhet që të vazhdojë fuqishëm puna për antarësimet në PS. Shkodra deri tani është qarku me numrin më të lartë dhe duhet që të vijojë me këtë ritëm. PS duhet që të jetë një parti gjithëpërfshirëse, të hapë dyert për të gjithë, të majtë e të djathtë, të mos jetë një parti hermetike dhe e ngurtësuar. Duhet të afrojmë edhe demokratët. Beneti i përfaqëson të djathtët kështu që demokratët e kanë derën e hapur”, tha Rama.
Rama theksoi gjithashtu se në Shkodër do të ketë investime të mëdha, ndërkohë që shtoi se stadiumi Loro Boriçi duhet që të rokonceptohet dhe të kthehet në turizëm sportiv.
“Shkodrën duhet që ta kapim në dorë Benet, kemi shumë punë. Ashtu si kanë lënë uzinën e telave të shkatërruar ashtu kanë lënë edhe Shkodrën. Edhe tek stadiumi ‘Loro Boriçi’ kemi bërë një investim të madh por e kanë lënë pas dore si çdo gjë në Shkodër. Duhet ta kthejmë në një turizëm sportiv stadiumin, të rikonceptohet ndryshe dhe të mirëmbahet si duhet. Shkodra është prioriteti ynë dhe të jeni të sigurtë se qeveria do të ketë një vëmendje të veçantë për investime të mëdha në Shkodër”, theksoi Rama.
Ndërsa në fund, Rama porositi që PS-ja të bëhet sa më shumë digjitale dhe punën të reklamohen sqa më shumë në Instagram e rrjete sociale.
“Partia duhet që të jetë më digjitale. Reklamoni gjërat në Instagram sepse ka shumë efekt. Unë për vete nuk jam ndonjë fans i madh por kur më ka dërguar kryetari i Bashkisë Vau Dejës Kristian Shkreli një video për Betlehemin dhe unë e kam postuar, kanë shkuar shumë njerëz për ta parë dhe e kanë postuar edhe ata”, u shpreh Rama.
