Merret sot vendimi për Fredi Belerin, kryebashkiaku i zgjedhur i Himarës, i cili akuzohet për blerje votash. Vendimi do të jepet nga GJKKO, ndërsa SPAK ka kërkuar 2 vite dhe 6 muaj burg për të.
Në foton më lart është edhe përfaqësuesi i ambasadës greke në momentin që hyn në Gjykatën e Posaçme në Tiranë.
Po ashtu Prokuroria e Posaçme ka kërkuar 2 vite burg për mikun e tij Pandeli Kokaveshi. Fredi Beleri është arrestuar më 12 maj të 2023-shit dhe akuzohet për blerje të votave në zgjedhjet vendore të 14 majit.
Siç shihet nga pamjet, të pranishëm në SPAK janë kreu i PBDNJ-së, Vangjel Dule dhe përfaqësuesi i Ambasadës greke. Çështja e Belerit ka sjellë përplasje dhe mes Greqisë dhe shtetit shqiptar.
Një ditë më parë, media greke "Ta nea" publikoi të dhëna kompromentuese për kryegjyqtaren Irena Gjoka që ka qenë e arrestuar dhe më pas e dëbuar nga Greqia për falsifikim dokumentash.
Irena Gjoka, që dikur mbante mbiemrin Shpata (Irena Shpata e cila që nga viti 2011 përdor mbiemrin e bashkëshortit të saj aktual (të dytë) Gjoka) rezulton të jetë arrestuar “për përdorimin e dokumenteve false me të cilat tentonte të tregonte se ishte me origjinë greke” shkruajti Ta Nea.
Arrestimin dhe dëbimin në Greqi, Irena Gjoka e ka mbajtur të fshehtë gjatë procesit të vetingut.
Të dhënat kompromentuese nuk ishin publikuar më herët dhe mbetet për t'u parë nëse do të kenë ndikim në procesin Beleri. Këshilli i Lartë Gjyqësor në vend se të merrte masa për Gjokën e ka mbështetur atë duke kërkuar që trupit gjykues të mos i bëhet presion nga mediat.
