Dhjetëra fermerë dhe protestues hynë sot me forcë duke u përleshur me forcat e rendit në panairin e përvitshëm të bujqësisë në Paris. Mes thirrjeve të fermerëve dëgjoheshin ofendime dhe kërkohej dorëheqja e Macron.
“Kjo është shtëpia jonë e përvitshme, e fermerëve, kurse ata na presin me policë specialë”, tha një protestues për agjencinë Reuters.
Macron kreu një takim të shkurtër me sindikatat e fermerëve, ndërsa më pas u bëri thirrje protestuesve të mos prishnin panairin.
Panairi i bujqësisë në Paris është një event madhor në Francë me më shumë se 600,000 vizitorë në nëntë ditët e tij. Eventi i sivjetshëm vjen në një kohë protestash masive të fermerëve në të gjithë Evropën kundër kufizimeve dhe rritjes së kostove nga qeveritë e BE-së, me reduktim të subvencioneve, dhe burokracive ambjentaliste të kërkuara nga BE.
