Partia Socialiste miratoi sot disa ndryshime në ligjin për zonat e mbrojtura, që përfshin parqet, pyjet dhe pasuri të tjera natyrore të Shqipërisë. Me ligjin e ri, socialistët i hapin rrugë ndërtimeve për hotele dhe resorte private edhe në parqet natyrore. Madje një investigim i gazetarit Artan Rama pak ditë më parë paraqiste një plan të gatshëm nga investitorët për të nisur ndërtimin e një kompleksi në parkun e Divjakës.
Ministrja e Kulturës, Mirela Kumbaro doli para gazetarëve për të mbrojtur ligjin që lë pa mbrojtje pasuritë kombëtare dhe tha se ndërtimet do të bëhen sipas ligjeve në fuqi.
E pyetur për investigimin e gazetarit Rama që publikoi pamje nga projekti tashmë i gatshëm për Divjakën, Kumbaro tha se në zyrat e shtetit ende nuk ka një propozim konkret.
Gjatë kohës që socialistët votonin ndryshimin e ligjit, jashtë parlamentit protestonin një grup i shoqërisë civile.
