Makinat SUV (Sport Utility Vehicles), të cilat kombinojnë komoditetin e makinave të pasagjerëve me elementët e automjeteve jashtë rrugës, po bëhen gjithnjë e më të njohura, por kërkojnë shumë hapësirë dhe ndotin mjedisin më shumë se makinat e tjera.
Në Paris, autoritetet komunale duken të vendosura për t’u “shpallur luftë” xhipave. Në një referendum të dielën, parisienëve u kërkohet të miratojnë rritje në tarifat e kontrolluara të parkimit të qytetit, të cilat me siguri do të dekurajojnë shumicën e shoferëve të SUV-ve.
Konkretisht, tarifa e re parashikon që një orë parkim do të kushtojë 18 euro në vendet më qendrore dhe 12 euro në rrethet e kryeqytetit francez.
Dhe jo vetëm kaq: çdo orë që kalon çmimet shumëfishohen. Kështu, llogaritet se për gjashtë orë parkim në qendër të Parisit, shoferi i fuoristradës do të duhet të paguajë tani 225 euro, ndërsa për të njëjtën kohëzgjatje një parking lagjeje do të paguajë 150 euro.
Këto çmime do të zbatohen për SUV-të me motor me djegie të brendshme që peshon më shumë se 1.6 ton, por edhe për SUV-të elektrike që peshojnë më shumë se 2 ton.
