Shqipëria është një ndër vendet me konsum të lartë të yndyrnave të prodhuar në mënyrë industriale në ushqime, duke ndikuar drejtpërsëdrejti në rritjen e sëmundjeve kardiake. Sipas raportit të Organizatës Botëreore të Shëndetësisë, Shqipëria është e shënuar me të kuqe në hartë, gjë që tregon nivelin e lartë të përdorimit të tyre në ushqime, duke e lidhur edhe me numrin e lartë të vdekjeve akute nga zemra.
Më shumë se 278 000 vdekje çdo vit në nivel global i atribuohen pikërisht marrjes së yndyrës trans të prodhuar në mënyrë industriale. Yndyrnat trans bllokojnë arteriet, duke rritur rrezikun e sulmeve në zemër dhe vdekjeve.
Sipas OBSH, tashmë është e faktuar se marrja e lartë e yndyrave trans rrit rrezikun e vdekjes nga çdo shkak me 34%, vdekjet nga sëmundjet koronare të zemrës me 28% dhe sëmundjet koronare të zemrës me 21%.
Raporti, i cili i referohet vitit 2023, thotë se në nivel global, përfshirë edhe Shqipërinë, nuk u arrit objektivi për eleminimin nga ushqimet të yndrynave trans.
Yndyrnat trans, të cilat prodhohen në mënyrë industriale nga hidrogjenizimi i pjesshëm i çdo vaji të lëngshëm, gjenden kryesisht në ushqimet e skuqura, ëmbëlsirat dhe ushqimet e gatshme.
