Mediat italiane i kanë kushtuar vëmendje vdekjes së të riut shqiptar Lorenzo Pjetrushi. Sipas tyre ai vdiq për shkak të një loje që do të publikohej në TikTok. Ai humbi jetën gjatë festimeve të ditëlindjes së kushëririt të tij, një shofer që sapo kishte marrë patentën. Lorenzo kishte tentuar të qëndronte në kofanon e makinës së tij në lëvizje për të krijuar efektin e sërfit. Nuk dihet se në ç’rrethana ai u rrëzua dhe mori plagë të rënda në kokë.
Pas 9 ditësh agonie në spital ai nuk ia doli. Lëndimet shumë të rënda të marra në kokë ishin fatale për të riun 18-vjeçar nga Treviso. Ai u shtrua në reanimacion që prej datës 21 janar dhe mbrëmjen e së hënës, më 29 janar, zemra i pushoi së rrahuri. Djali me origjinë shqiptare dhe banues me familjen në Ormelle (Treviso), ishte transportuar me urgjencë në spitalin e Trevisos dhe gjendja e tij u shfaq menjëherë kritike.
Sipas hetimeve, përveç rrëzimit, ai është goditur më pas nga makina në lëvizje. Shokët e të riut ishin ata që bënë thirrje për ndihmë. Mbrëmja e festës përfundoi në tragjedi për shkak të videos së sfidës që do të publikohej në Tik Tok. Vetë kushëriri, me patentën e marrë disa muaj më parë, drejtonte makinën në kofanon e së cilës Lorenzo donte të performonte, duke u përpjekur të qëndronte në këmbë teksa ajo ishte në lëvizje.
18-vjeçari, i cili ishte në vitin e fundit të një instituti teknik në Oderzo dhe ëndërronte të bëhej mekanik, humbi ekuilibrin dhe në mënyrë të pashmangshme dhe u godit nga makina. Policia është ende duke e hetuar rastin. Në makinë, përveç kushëririt në timon, ndodheshin edhe 3 shokë të viktimës, të gjithë bashkëmoshatarë të tij, të cilët me sa duket ishin dëshmitarë të “sfidës” shumë të rrezikshme që më pas do të postohej në rrjetet sociale.
I intervistuar nga “La Tribuna di Treviso”, Agroni, babai i Lorencos, flet për dhimbjen që po përjeton familja. “Lorenco ishte shumë i mirë. Si shumë të rinj të moshës së tij i pëlqente të luante dhe të jetonte jetën. Atë mbrëmje të së shtunës e kisha çuar në një festë ditëlindjeje në Cimadolmo, me miqtë, e cila u mbajt rreth orës 22. Më pas nuk e di se çfarë ndodhi. Ndoshta më pas ka dalë me kushëririn tjetër, italian, por me origjinë shqiptare. Nuk kemi fjetur për 8 ditë” –thotë ai duke u shprehur se nuk e ka të qartë dinamikën e aksidentit.
“Ndoshta gjithçka ka ndodhur si shaka, një lojë që përfundoi keq. Në makinë ishin 5 prej tyre, një Ford. E drejtonte kushëriri i tretë i djalit tim. Ai kishte vetëm 2 muaj me patentë, jo me shumë përvojë. Por ata nuk po bënin video ose foto për t’i postuar në TikTok, siç thanë disa njerëz gabimisht. Se si ka ndodhur. E di vetëm policia, pasi i ka dëgjuar djemtë dhe ka konfiskuar të gjithë celularët, por nuk ka gjetur foto apo video. Djali im nuk ka bërë kurrë video për TikTok” – thotë ai. ©LAPSI.al
