Dy protestuese kanë hedhur supë ndaj pikturës së famshme të Mona Lisa. Piktura e shekullit të 16-të e Leonardo da Vinci është një nga veprat më të njohura të artit në botë dhe mbahet në Luvrin në qendër të Parisit. Muzeu reagoi zyrtarisht se vepra ishte pas xhamit mbrojtës dhe nuk ishte dëmtuar. Video e publikuar në rrjetet sociale tregon dy gratë e veshura me bluza që shkruanin "kundërsulm ushqimor" duke hedhur lëngun.
Më pas ato qëndruan përpara pikturës duke thënë: “Çfarë është më e rëndësishme? Arti apo e drejta për ushqim të shëndetshëm dhe të qëndrueshëm? Sistemi juaj bujqësor është i sëmurë. Fermerët tanë po vdesin në punë”. Kanë ndërhyrë menjëherë forcat e sigurisë duke vendosur mbulesa të zeza përpara pikturës përpara se dhoma të boshatisej.
Ministrja e Kulturës së Francës, Rachida Dati tha se "asnjë arsye" nuk mund të justifikojë sulmin ndaj Mona Lizës. “Ashtu si trashëgimia jonë u përket brezave të ardhshëm" – shkroi ajo në X. Kryeqyteti francez është përfshirë nga protesta të fermerëve ditët e fundit që kërkojnë dhënien fund rritjes së kostove të karburantit dhe për thjeshtimin e rregulloreve.
Mona Lisa ka qenë pas xhamit të sigurisë që nga fillimi i viteve 1950, kur u dëmtua nga një vizitor që hodhi acid mbi të. Në vitin 2019, muzeu tha se kishte instaluar një formë më transparente xhami antiplumb për ta mbrojtur atë. Në vitin 2022, një aktivist hodhi tortë në pikturë, duke u kërkuar njerëzve të "mendojnë për Tokën".
Piktura u vodh nga Luvri në vitin 1911, duke shkaktuar një sensacion ndërkombëtar. Vincenzo Peruggia, një punonjës i muzeut më të vizituar në botë, u fsheh në një dollap gjatë natës për të marrë pikturën. Ajo u gjet dy vjet më vonë kur ai u përpoq t'ia shiste një tregtari antikesh në Firence të Italisë. ©LAPSI.al
