U bë simboli i maternitetit të Mariupolit, Marianna i del në mbrojtje Putinit

Në Ukrainë, po shkakton reagime mbështetja e hapur që po i bën Vladimir Putinit, Marianna, gruaja shtatzënë që u bë simboli i spitalit të bombarduar të fëmijëve në Mariupol. Vajza, e cila jeton mes Donetskut dhe Moskës nuk e kishte fshehur kurrë më herët orientimin e saj pro-rus, por tashmë emri i saj në listën e nënshkrimeve për të mbështetur kandidaturën e presidentit rus në zgjedhjet presidenciale të 2024 i ka habitur të gjithë.

“Gjeta kohë të shkoj në pikën e grumbullimit të firmave për të mbështetur Vladimir Vladimirovich Putin si kandidat për presidencën e Rusisë. Për mua një zgjedhje e tillë është e qartë. Nuk shoh asnjë arsye për të ndryshuar asgjë. Tani, pavarësisht nga sanksionet dhe të gjitha problemet, Rusia po zhvillohet në mënyrë dinamike. Ajo po mbron qytetarët e saj dhe po punon për ta bërë të nesërmen më të mirë se dje.

Nuk mund të mohohet se është e lidhur me personalitetin e një personi specifik, nën drejtimin e përgjithshëm të të cilit merren vendimet e duhura siç e shohim edhe nga rezultatet. Dhe sa vendime të tjera të ngjashme janë marrë në vitet e kaluara. Kjo është arsyeja pse unë, si shumë qytetarë të tjerë, mbështes Vladimir Vladimirovich!", - ka shkruar vajza në Instagram si një mbishkrim shoqërues të një fotoje në të cilën është përjetësuar teksa firmoste në mbështetje të kandidaturës së Putinit.

Postimi i vajzës ka ngjallur urrejtje tek ndjekësit e saj. “Putini për pak sa nuk të vrau djalin dhe ti i vendose një firmë”; “Të gjithë u shqetësuan për të kur panë ato të shtëna dhe ajo doli të ishte një krimb, në shitje”; “Epo, çfarë të them, je shitur”, “Ti më neverit, turp të kesh” - janë disa nga shumë komentet.

Më 9 mars 2022, një bombë goditi repartin e maternitetit të një spitali në Mariupol. Fotoja e Marianna, një blogere e re në muajin e 9-të shtatzënë, me plagë në fytyrë, pas shpërthimeve, bëri xhiron e botës. Por Moska kishte folur për një falsifikim. Në atë kohë rusët pretenduan se vajza ishte "një aktore e vendosur atje" për propagandë anti-Kremlin. Më pas, Marianna u tha gazetave ruse se spitali ishte i pushtuar nga regjimenti ukrainas Azov që përdorte gratë që po lindnin si mburoja njerëzore. ©LAPSI.al