Opozita është përgatitur ta "djegë" edhe kësaj radhe kuvendin, pasi komisionet hetimore i janë refuzuar me ligj, ndërsa kreu i demokratëve është në arrest shtëpie.
Por në seancën e parë të vitit 2024, socialistët kërkojnë normalitet dhe këtë synojnë ta arrijnë me praninë e presidentit Bajram Begaj që pak minuta para nisjes së seancës është parë në ambjentet e parlamentit.
Përveç Begajt, në parlament janë edhe ambasadorët e huaj si ai Britanisë, Alastair King-Smith dhe ai gjerman në vendin tonë, Karl Bergner.
“Sot Kuvendi do të mbajë seancën e parë të këtij viti. Kam respekt të madh për rolin e parlamentit si një institucion i domosdoshëm në një demokraci dhe gjithashtu për ata deputetë që punojnë fort për të fituar shumicën për propozimet e tyre në komisione dhe në seancë plenare në Kuvend.
Me të drejtë qytetarët presin që Parlamenti të jetë një forum ku diskutohen ide të ndryshme politike në mënyrë konstruktive dhe me respekt. Unë besoj se Parlamenti i qëndron kësaj përgjegjësie.” ka qenë mesazhi i ambasadorit gjerman ditën e sotme.
Mbetet për t'u parë nëse deputetët e opozitës do të kompleksohen nga prania e ambasadorëve apo do të vazhdojnë protestën e tyre pavarësisht pranisë së përfaqësuesve të huaj.
