Në vetëm 28 sekonda 44-vjeçari Vasilis Zabunis, një nga emrat më të njohur të mafias në Greqi, u ekzekutua. Ngjarja ndodhi mëngjesin e të dielës nga dy autorë të paidentifikuar.
Nga raportimet e medieve greke, njëri prej personave pasi ka zbrazur karikatorin e parë nga kallashnikovi, ka ndërruar karikatorin dhe pasi ka mbetur bosh, ka hapur derën e shoferit dhe ka qëlluar edhe një herë 44-vjeçarin nga afër, për t'u siguruar që kishte humbur jetën. Sipas informacioneve, në vendngjarje janë gjetur mbi 90 plumba kallashnikovi.
Zabunis ishte akuzuar si drejtues i një grupi zhvatësish, por edhe për disa vrasje, për të cilat nuk u gjetën prova. Ndaj tij pati një tjetër atentat në vitin 2018 në Pire, por ai arriti të mbijetonte. 44-vjeçari gjithashtu akuzohej si ekzekutori i bandës së vëllezërve Vlastos, të vrarë njëri një në burg dhe tjetri me atentat. Zabunis tentoi t'i bënte atentat gjykatëses që po gjykonte vllezërit Vlastos në 2012. por ngjarja u shmang falë ndërhyrjes së policisë.
