Përfaqësues pranë Njësisë së Mbrojtjes së Fëmijëve në Pogradec thonë se për rastin ku pak ditë më parë u arrestua një 29-vjeçar pasi dyshohet se ka kryer marrëdhënie me një të mitur, janë ndjekur hapat e protokollit përfshirë këshillimin, shoqërimin dhe orientimin e fëmijës për rastin. Mësohet se e mitura ka kërkuar të takojë disa herë përfaqësuesen e kësaj zyre si një person të besuar të saj.
Po ashtu njësia e mbrojtjes së të drejtave të fëmijëve ka nisur punën për të gjetur një tjetër institucion për shkollimin e vajzës për arsye se nuk mund të rikthehet në shkollën e saj, për sigurinë dhe mbrojtjen nga bullizmi ndërsa për sa i përket strehimit do të bëhet e mundur me bashkëpunimin me organizata të ndryshe për mundësi për ta ndihmuar, pasi sipas tyre nëna dhe vajza janë banore e qyteti të Përrenjasit dhe për këtë rast është mbledhur grupi teknik ndër sektorial ku janë thirrur dhe përfaqësues nga drejtoria e shërbimit social në Bashkinë Përrenjas.
Gjithashtu është kërkuar që vajza të rehabilitohet në një qendër për t'i ofruar ndihmë psikologjike, e ofruar nga organizatat e ndryshme, por 12-vjeçarja ka ngulur këmbë të mos largohet nga nëna e saj, pasi nëse do e çojnë në qendër trajtimi sipas fjalëve të saj, do të dëmtojë veten. Në këto kushte nuk mund të kryhet strehimi në qendër trajtimi, pasi merret parasysh interesi më i lartë i fëmijës dhe dëshira e saj. Gjithashtu analiza gjinekologjike pritet të kryhet ditën e hënë dhe rezultatet do t’i bashkëngjiten dosjes hetimore për procedura të mëtejshme.
Më parë 29-vjecari është lënë nga gjykata e Korçës nën masën e sigurisë arrest me burg. Ai përballë togave të zeza nuk ka pranuar akuzën madje as babai i djalit i cili dha një intervistë për mediat ku deklaroi se është shenjë hakmarrje nga nëna e vajzës pas ndarjes. Nga ana tjetër nëna e vajzës është ajo që ka bërë denoncimin në polici dhe ka deklaruar se vajza e saj prej dy vitesh ka një lidhje me 29-vjecarin, fakt që e ka pranuar edhe vetë vajza e vogël e cila ka thënë se nuk ka qenë e detyruar nga askush por kanë dashur të dyja palët lidhjen madje ajo nuk ka dashur që 29-vjeçari të arrestohet.
