Dallëndyshe Bici nuk ka pranuar mandatin e deputetes së PS-së. Ajo i ka kthyer përgjigje kreut të Komisionit Qendror të Zgjedhjeve, duke thënë se nuk do të pranojë vakancën e krijuar pasi Arben Ahmetaj e humbi mandatin e deputetit.
Me një shkresë, e cila mbante datën 8 janar, Kuvendi i Shqipërisë njoftoi se Ahmetaj e ka humbur mandatin, pasi në gjashtë muajt e fundit nuk është paraqitur në asnjë seancë plenare. Ish-zëvendëskryeministri ndodhet në arrati prej 6 muajsh. Ndaj tij janë ngritur tri akuza penale nga SPAK, për korrupsion pasiv, pastrim parash dhe fshehje pasurie. Mandati pritet t'i kaloj Plarent Ndrecës.
