Gëzim Sinomati ishte viktima e rradhës së atentateve në qytetin e Vlorës. Mbrëmjen e djeshme, 22-vjeçari u qëllua për vdekje në ballkonin e shtëpisë me snajper, në zonën e Poliklinkës së Vlorës.
Sinomati ishte kthyer në Shqipëri për pushime pasi prej vitesh jetonte në Belgjikë. Ngjarja dyshohet të ketë shkak hakmarrjen mes bandave. 2 vite më parë, iu bë një atentat xhaxhait të 22-vjeçarit, që mendohet të kenë lidhje me grupin e “Gaxhait” në Vlorë, rivalë të grupit të “Çoles”.
Pas vrasjes policia nisi kërkimet për autorin apo autorët e dyshuar. Vetëm pak minuta më vonë, në lagjen 24 Maji u gjet një BMW e djegur, dyshohet të jetë përdorur nga autorët për krimin.
Sakaq, gjatë mbrëmjes forcat e policisë shoqëruan në komisariat 15 persona që kanë pasur njohje me viktimën si dhe familjarë të tij.
