Në aferën e re që po hetohet nga SPAK për Ilir Beqajn, bën shumë përshtypje fakti se si ish-ministri nuk hoqi dorë nga përfitimet duke shfrytëzuar postin në krye të SASPAC ndonëse kishte hesape të hapura me drejtësinë për koncensionin e sterilizimit. Pra, edhe pse ishte person nën hetim për një aferë të madhe, ndërkohë që Rama e gradoi në krye të një super agjencie, ai parësore kishte përfitimin dhe fshehjen e pasurisë përmes njerëzve të tij të besuar.
Nëse nga koncensioni i sterilizimit vjedhja ishte përqëndruar në paratë e buxhetit të shtetit, te SASPAC shënjeshtra ishin fondet që Bashkimi Europian jep për Shqipërinë përmes programeve të ndryshme. Ka një detaj tjetër shumë interesant që dëshmon babëzinë e Ilir Beqajt për të përfituar sa më shumë e në formë të vazhdueshme.
Fiks një javë më parë, të shtunën e datës 23 dhjetor 2023, punonjësit e SASPAC u mblodhën për darkën festive të Vitit të Ri pikërisht në restorant “Gzona” në zonën e Kalasë së Tiranës. Pra, edhe shpenzimet për këtë darkë festive kurrsesi nuk duhej të shkonin në ndonjë restorant tjetër. Edhe pse ishte larguar nga drejtimi i SASPAC, Beqaj i “detyroi” ish vartësit e tij të darkonin në restorant “Gzona”. Zor të mendosh se zgjedhja e restorantit të njohur botërisht si biznesi i shefit të tyre ishte krejt rastësore nga punonjësit e SASPAC. Madje siç mëson Lapsi.al në atë darkë festive ishte edhe vetë Ilir Beqaj.
SPAK thotë në dosjen e publikuar së pari ekskluzivisht nga Lapsi.al , se Ilir Beqaj kontrollonte de fakto restorantin “Gzona” përmes vartësit e sekserit të tij Ermal Kurtulaj. Restoranti ishte krijuar nga bashkëshortja e Beqajt dhe më pas i ishte shitur Eduard Currajt i cili rezulton edhe pronar i kompanive ‘Curri Group’, ‘Curri SHPK’, ‘Delta Holding’, që nga ana e saj ka në pronësi kompani si ‘Delta Pharma’, Avicena apo farmacitë ‘Ditë e Natë’, biznese që u kontrolluan të enjten nga SPAK.
Në restorantin “Gzona” shtroheshin vazhdimisht dreka e darka për llogari jo vetëm të agjencisë që drejtonte Ilir Beqaj, por edhe të institucione të tjera qeveritare. Për këtë mjafton të shohësh listëpagesat miliona lekë në Thesar. Nuk është thjesht çështje e një restoranti të suksesshëm që preferohet masivisht, por më shumë ngjan të jetë një ndërhyrje e Ilir Beqajt për të kanalizuar para në biznesin prej nga ai kishte hequr dorë formalisht me letra, por asnjëherë faktikisht.
Dhe sikur të mos mjaftonte kjo, restoranti thotë SPAK përdorej edhe për skemën e përfitimit përmes faturave fiktive. SPAK ka ushtruar kontrolle në disa biznese e banesa, si dhe ka sekuestruar celularë e kompjutera në zyrat e SASPAC dhe kompanive të tjera të lidhura me Ilir Beqajn dhe njerëzit e tij të besuar. ©LAPSI.al
