Raportet mes Shqipërisë dhe Greqisë vazhdojnë të jenë në qendër të vëmendjes në mediat helene. Gazeta greke ‘Kathimerini’ shkruan sot se ‘Athinë është në pritje të lëvizjes së radhës të Edi Ramës’ sa i takon çështjes Beleri.
“Pak para Krishtlindjeve, Rama kishte shpallur në fakt shkarkimin e kryebashkiakut në detyrë Jorgo Goro , i cili humbi në zgjedhjet e majit përballë Fredi Belerit, por vazhdon të qëndrojë në detyrë”, shkruan gazeta, e cila përmend tre emra të mundshëm që Rama kishte propozuar për kryetar të përkohshëm të bashkisë.
Por pas një reagimi të Fredi Belerit, i cili artikulonte se kryetar i përkohshëm duhet të jetë një nga këshilltarët e zgjedhur nga rezultatet e majit, tre emrat u anuluan, shkruan me tej Kathimerini.
“Athina është padyshim në konsultim me Belerin, pasi po kërkohet një raport në një çështje që shkon shumë përtej marrëdhënieve greko-shqiptare dhe siç është parë kohët e fundit, ka ndikuar edhe në diskutimin e përgjithshëm për perspektivën europiane të Ballkanit Perëndimor.
Megjithatë, pas lëvizjeve të fundit të kryeministrit Rama, disa analistë dhe gazetarë në Shqipëri besojnë se kryeministri në fakt po përpiqet t’i hapë rrugën përsëritjes së zgjedhjeve në bashkinë e Himarës”, thuhet më tej në shkrimin e gazetës helene.
