Policia në Serbi hodhi gaz lotsjellës për të parandaluar qindra mbështetës të opozitës të hynin në ndërtesën e këshillit të qytetit të kryeqytetit të dielën në shenjë proteste ndaj asaj që vëzhguesit e zgjedhjeve thanë se ishin parregullsi të përhapura në votime gjatë zgjedhjeve të përgjithshme fundjavën e kaluar.
Presidenti i Serbisë, Aleksandar Vuçiç, tha se ishte një përpjekje për të rrëzuar qeverinë e orkestruar nga jashtë. Ai tha se më shumë se 35 persona u arrestuan dhe do të pasonin më shumë ndalime.
“Kjo ishte një tentativë për marrjen e dhunshme të institucioneve shtetërore të Republikës së Serbisë”, tha Vuçiç për televizionin pro-qeveritar Pink.
Autoritetet populiste të vendit kanë mohuar manipulimin e votave dhe i kanë përshkruar zgjedhjet për të mbushur parlamentin dhe zyrat lokale si të drejta. Z. Vuçiç tha të dielën se pretendimet për parregullsi në votim ishin “gënjeshtra” të hapura të promovuara nga opozita politike.
Vuçiç sugjeroi se trazirat ishin nxitur nga jashtë, por nuk dha asnjë provë për të mbështetur pretendimin. Duke iu drejtuar kombit në mediat shtetërore ndërsa protesta po zhvillohej jashtë bashkisë së Beogradit, ai i quajti demonstruesit “banditë” të cilët nuk do të kishin sukses në destabilizimin e shtetit dhe tha:
“Ky nuk është një revolucion”.
“Ata nuk do të kenë sukses”, tha presidenti serb.
“Ne po bëjmë çmos me reagimin tonë të qetë dhe të butë për të mos lënduar demonstruesit”, të cilët erdhën në ngjarje për të protestuar në mënyrë paqësore.
Policia fillimisht u barrikadua brenda ndërtesës së qeverisë së qytetit, duke hedhur gaz lotsjellës ndërsa qindra protestues të opozitës thyen xhamat në hyrje. Më pas, policia e shtyu turmën nga qendra e qytetit dhe bëri disa arrestime.
Protestuesit bërtisnin “Hape derën” dhe “Hajdutë”, ndërsa goditën ndërtesën me vezë dhe gurë. Disa brohoritën “Vuçiç është Putin”, duke e krahasuar presidentin serb me liderin rus.
Nebojsha Zelenoviç, një nga udhëheqësit e aleancës opozitare Serbia kundër dhunës, tha se oficerët e policisë pushtuan të gjithë qendrën e Beogradit, duke përfshirë çatitë e ndërtesave. Zona është shtëpia e parlamentit kombëtar dhe selisë presidenciale së bashku me qeverinë e qytetit.
Nuk pati raportime për të lënduar.
Rezultatet nga zgjedhjet e 17 dhjetorit treguan një fitore të Partisë Progresive Serbe të Vuçiç si në votimin parlamentar ashtu edhe në atë të qytetit të Beogradit. Serbia kundër dhunës, kundërshtari kryesor i partisë, tha se asaj iu grabit një fitore, veçanërisht në Beograd.
“Ne do të vazhdojmë me luftën tonë”, tha z. Zelenoviç.
Një mision vëzhgimi i përbërë nga përfaqësues të mbikëqyrësve ndërkombëtarë të të drejtave raportoi parregullsi të shumta, përfshirë raste të votave të blera dhe mbushje të kutive të votimit.
Vëzhguesit vunë re gjithashtu kushte të padrejta për kandidatët e opozitës për shkak të njëanshmërisë së medias, abuzimit të burimeve publike dhe dominimit të presidentit gjatë fushatës.
“Policia është kudo, edhe në çati. Është e qartë se ata nuk duan të njohin të rezultatet e zgjedhjeve. Ne do të vazhdojmë me luftën tonë”, tha Zelenoviç.
Votimi ka shkaktuar tensione politike në Serbi, një vend i trazuar ballkanik që po kërkon lidhje të ngushta me Rusinë, por edhe anëtarësimin në Bashkimin Evropian.
‘Serbia kundër dhunës’ tha në një letër dërguar të enjten institucioneve të BE-së, zyrtarëve dhe vendeve anëtare se nuk do të njihte rezultatin e zgjedhjeve.
Aleanca i bëri thirrje BE-së të bëjë të njëjtën gjë dhe kërkoi të nisë një hetim.
