Familja e Liridona Ademajt, 30-vjeçares që u vra më 29 nëntor në fshatin Bërrnicë të Prishtinës sot është informuar nga Prokuroria Themelore në Prishtinë rreth rastit të vrasjes së saj.
Në këtë takim ishin babai dhe vëllai i Liridonës.
Leondardi, i vëllai i Liridonës, njofton se ky takim ua lehtësoi dhimbjen dhe u ofroi një siguri edhe më të madhe që hetimet janë duke shkuar mirë.
“Sot mbajtëm takim në Prokurorinë Themelore në Prishtinë dhe u informuam rreth rastit të vrasjes së Liridonës tonë, brenda kufinjëve që lejon ligji.
Ky takim na e lehtësoi dhimbjen dhe na ofroi një siguri edhe më të madhe që hetimet janë duke shkuar mirë.
U dakorduam që tani e tutje do të kemi takime të rregullta informuese.
Ne i shprehëm falenderimet hetuesëve, prokurores së rastit dhe të gjithë prokurorëve që janë duke ndihmuar në zbardhjen e plotë të rastit.
Ne besojmë në të gjitha institucionet e drejtësisë dhe mbesim me shpresë që rasti do të zgjidhet në mënyrë profesionale”, shkruan ai.
Kujtojmë se këtë takim urgjent ishte vëllai i Liridonës ai që e kërkoi nëpërmjet një postimi në "Facebook".
