Pas arrestimit të drejtorit të përgjithshëm të Bashkisë së Tiranës, Taulant Tushe, opozita ka kërkuar që SPAK të arrestojë edhe Erjon Veliajn për firmën që ka hedhur për inceneratorin e Tiranës. Ndaj në fillim të mbledhjes së këshillit bashkiak këtë të premte, kur Veliaj ka nisur fjalën, këshilltari bashkiak Tedi Blushi i është afruar dhe i ka "dhuruar" një palë pranga si simbolikë të përgjegjësisë që duhet të mbajë kryebashkiaku. Video më poshtë:
"I dhurova sot Erjon Veliaj një palë pranga në mbledhjen e Këshillit Bashkiak. Prangat janë drejtësia për aferën e inceneratorit inekzistent të Tiranës dhe për qindra milionë euro të vjedhura përmes kësaj skeme kriminale. Prangat janë simboli i ndëshkimit për keqmenaxhimin dhe vjedhjen e taksave tona në këto vite. Prangat janë ndëshkimi për betonizimin dhe shkatërrimin e Tiranës. Prangat janë shpagimi për shtëpitë e shembura në shkelje të ligjit, për gjobat e padrejta, për braktisjen dhe lënien në harresë të qytetarëve në nevojë dhe personave me aftësi të kufizuara. Prangat janë simboli i drejtësisë, me paanësi dhe jo me regji!" ka shkruar Blushi në rrjetet sociale pas këtij gjesti.
Në pak sekonda, mbledhja është ndërprerë dhe është thirrur policia bashkiake për të nxjerrë jashtë Blushin. Ky incident shënoi mbledhjen ku u votua pa diskutime buxheti i vitit 2024 për Bashkinë e Tiranës.
