Instituti amerikan Robert Lansing, ka publikuar një analizë duke u shprehur se ka një mundësi reale të një sulmi të ngjashëm me të 24 shtatorit në Banjskë që mund të ndodhë në veri të Kosovës.
Sipas tyre presidenti serb Aleksandar Vuçiç ka treguar një qasje të fortë gjatë bisedimeve me Sekretarin e Përgjithshëm të NATO-s, Jens Stoltenberg, në një turne diplomatik në Ballkanin Perëndimor.
Gjatë një takimi të mbajtur në Beograd në fund të nëntorit, Stoltenberg e shprehu ndjeshmërinë e tij ndaj përqendrimit të forcave ushtarake serbe pranë kufijve të Kosovës, e cila sipas tij, po e përkeqëson më tej situatën mes dy vendeve që tashmë përjetojnë tensione. Vuçiç u përgjigj ashpër duke deklaruar të drejtën e vendit të tij për të vendosur forcat e tij ushtarake brenda kornizës kushtetuese.
“Serbia ka bërë manovra të tilla të shpeshta, duke vendosur trupa pranë kufirit me Kosovën, veçanërisht pas incidentit në Banjskë, duke shkaktuar shqetësim në perëndim dhe çuar në ndërhyrje diplomatike që rezultuan në tërheqjen e trupave”.
“Pasojat e politikave të Vuçiçit dhe mënyra e tij e të menduarit rreth BE-së dhe NATO-s janë të qarta. Vetë Serbia ka mbështetur Rusinë haptazi dhe ka ndaluar stërvitjet ushtarake ndërkombëtare në terrenin e saj që nga fillimi i konfliktit rus në Ukrainë”, thotë instituti.
Me pas, qeveria ukrainase ka dhënë sinjale alarmi rreth mundësisë që Rusia të kërkojë të shkaktojë trazira në Ballkanin Perëndimor përmes lidhjeve të saj me Serbinë.
Presidentja e Kosovës, Vjosa Osmani, ka shprehur këto shqetësime përpara samitit Bashkimi Evropian-Ballkani Perëndimor, duke u zotuar se do të ngrinte këto çështje me liderët evropianë.
Shqetësimet për sulme të reja në Kosovë janë theksuar dhe nënvijëzuar nga një grup i organizuar i mbështetur nga Serbia, i pajisur me armatim të rëndë, duke i bërë konfliktet të mundshme të vazhdueshme, të cilat mund të incizojnë edhe grupe të ngushta me Moskën.
Ndërsa NATO-ja ende diskuton mbi stabilitetin e pranisë së saj në Kosovë, veçanërisht pas incidenteve të shtatorit, Serbia vijon të krijojë tensione dhe të paraqet një kërcënim lufte për Kosovën.
“Serbia duket e gatshme të nxisë konflikte të përhershme në rajon, duke shfrytëzuar jo vetëm grupet serbe brenda Kosovës, por edhe ato të rreshtuara me Moskën”.
Në këtë fushatë, çështja e marrëdhënieve me Kosovën ka qenë në qendër të diskursit, e cila ka ndikuar në pozicionimin elektoral të Vuçiçit.
“Integrimi i Serbisë në BE ka marrë pak vëmendje, dhe kur është përmendur, është lidhur direkt me çështjen e Kosovës. Vuçiç vazhdon të përdorë gjuhën e fortë politike, duke tërhequr mbështetje me fjalët “Unë nuk do të mund ta mbroj Kosovën pa mbështetjen e popullit serb””, thekson instituti amerikkan.
Në anën tjetër, opozita e bashkuar në Serbi kundër dhunës dhe pakënaqësive të brendshme mund të sjellë një kthesë në skenën politike, por pritet të shihet nëse kjo do të ndikojë në zgjedhjet e ardhshme dhe në marrëdhëniet me Kosovën dhe Perëndimin.
