Serbia mbajti zgjedhjet e përgjithshme këtë të diel dhe ato lokale për disa qytete. Sipas vlerësimeve të publikuara, deri në orën 19:00 pjesëmarrja e zgjedhjeve parlamentare ishte 55.9%. Në zgjedhjet e vitit të kaluar pjesëmarrja ishte 54.6%. Në Beograd deri në orën 19.00 pjesëmarrja ishte 54,3% ndërsa në zgjedhjet e fundit ishte 54,8%.
Përsa u përket rezultateve paraprake duket se surprizat janë të pakta, për momentin. Partia e presidentit Aleksandër Vuçiç ka marrë 46.6% të votave e përkthyer në 129 mandate në parlamentin me 250 vende duke mbetur ende në pushtet.
Në vend të dytë u rendit koalicioni opozitar “Serbia kundër dhunës” i formuar pak muaj më parë pas ngjarje të rënda me disa viktima dhe që shkaktoi protesta masive në kryeqytet. Ky koalicion numëron për momentin 23.1% ose 63 mandate në parlament. E treta është renditur partia e Ivica Daçiç.
Sipas të dhënave të deritanishme, ka siguruar një mandat në parlament edhe koalicioni “Beteja politike e shqiptarëve vazhdon” e Shaip Kamberit.
“Jemi shumë afër sigurimit të një mandati, por kjo nuk përcaktohet vetëm nga votat që marrim, por nga dalja e përgjithshme në votime. Nga fakti se a do të digjet ndonjë listë e partive qendrore të cilat s’arrijnë të marrin 3% të votave të domosdoshme, sa është kuota ajo që ligji e përcakton si pragu natyror për një mandat”, ka deklaruar Kamberi për RTK-në.
Me interes pritet rezultati i zgjedhjeve për bashkinë e Beogradit. Opozita është shprehur se Vuçiç do ta humbë kryeqytetin, por nga kampi qeveritar i kanë hedhur poshtë këto pretendime duke shpallur fitoren. ©LAPSI.al
